एनआरएनको नेतृत्व हिराचनले गर्ने

काठमाडौं, २९ असोज(दैनिकी)

राजधानीमा जारी गैरआवासीय नेपाली संघ एनआरएनको चौथो विश्व सम्मेलनले संघको नेतृत्वका लागि देवमान हिराचनलाई सर्वसम्मत चयन गर्ने भएको छ । यसअघि रामप्रताप थापा र हिराचन अध्यक्षको प्रत्यासी बन्ने घोषणा भएको थियो । नेतृत्वमा सहमति कायम गर्न राती अबेरसम्म भएको छलफलमा हिराचनलाई साझा उम्मेद्धार बनाउने सहमति भएको एनआरएनका प्रवक्ता जुगल भुर्तेलले जानकारी दिए ।
निर्विरोध घोषणा भने मनोनयन प्रक्रिया सकिएपछि मात्र थाहा हुने बताइएको छ । वार्षिक साधारण सभाको क्रममा अहिले महासचिवका प्रगति प्रतिवेदन र कोषाध्ध्यक्षको आर्थिक प्रतिबेदनमाथि छलफल भइरहेको छ । ती प्रतिवेदनहरु पारित लगतै निर्वाचन कमिटी गठन गरी निर्वाचन प्रक्रिया अघि बढ्नेछ ।
विश्वका ५२ मुलुकका ६ सय बढी प्रतिनिधिहरुको सहभागीता रहेको सम्मेलनमा नेपालको आर्थिक विकासका विभिन्न क्षेत्रहरुलाई समेटेर काठमाडौ घोषणा पत्र जारी हुँदैछ । यसअघि नेपालको आर्थिक विकासमा एनआरएनको भुमिका र सम्भावनाको बारेमा दुई दिनसम्म छलफल भएको थियो । सम्मेलनको समापन समारोहमा प्रधानमन्त्री माधवकुमार नेपालले सम्बोधन गर्ने कार्यक्रम रहेको छ ।

अर्थ - थप सामग्री