सूचना प्रविधिमा पछाडि परेकै कारण हामी पछाडि : प्रधानमन्त्री

लक्की चौधरी काठमाण्डौं, २९ पुष

विश्वका अधिकांश राष्ट्र सूचना प्रविधिमा फड्को मारिरहेको बेला नेपाल यसमा सोचे जस्तो प्रगति गर्न नसकेकै कारण हालसम्म पछाडि परेको कुरा प्रधानमन्त्री माधवकुमार नेपालले बताउनु भएको छ। बुधबार देखि काठमाण्डौंको भृकुटीमण्डपमा आयोजित …क्यान इन्फोटेक २०१०' को उद्घाटन गर्दै प्रधानमन्त्री नेपालले सो कुरा बताउनु भएको हो। देशको समग्र विकासका लागि अव हामी नेपाली सूचना प्रविधिको विकासमा लाग्नु आवश्यक छ। २१ औं शताब्दीको बेला पनि हामी यस क्षेत्रमा जागरुक हुन नसक्नु दुःखद् पक्ष हो, उहाँले भन्नु भयो। संविधानसभा निर्माणभएपछि मात्र यी सब विषयले गति लिने कुरामा प्रधानमन्त्री नेपालले विश्वास व्यक्त गर्नु भयो।
कम्प्यूटर एसोसियशन अफ नेपालको आयोजनामा पुष २९ देखि माघ ४ गतेसम्म छ दिन सञ्चालन हुने सो मेलामा सूचना प्रविधिका आधुनिक सामग्री ल्यापटप, पेनड्राइभ, इन्भर्टर, कम्प्यूटरका सम्पूर्ण पार्टस् तथा सामग्री, विभिन्न ब्राण्डका व्याट्री, जेनेरेटर लगायतका सामग्री प्रदर्शन तथा विक्रीका लागि राखिएका छन्।
छ दिनको अवधिमा चार लाख बढी दर्शकले अवलोकन गर्ने क्यानका केन्द्रीय सदस्य ओम पनेरुले जानकारी गराए। कुम्भमेलाको रुपमा चिनिएको मेलामा २ सय ७० स्टल राखिएका छन्। मेलामा सूचना प्रविधिसम्बन्धी विद्यार्थीका लागि ज्ञानवर्द्धक गोष्ठी र कार्यक्रमको आयोजना समेत गर्ने भएको छ। मेलामा सर्वसाधारणका लागि रु. ५० र विद्यार्थीका लागि रु. ३० प्रवेश शुल्क कायम गरिएको छ।

प्रबिधि - थप सामग्री