ढाकामा नेपालको स्वर्णिम दिन

तेक्वान्दो खेलाडी दिपक बिष्टले सागमा लागतार चौथौं स्वर्ण जितेर किर्तिमान कायम गरे

मनोरञ्जन शर्मा बंगलादेश,माघ २५

बंगलादेशमा जारी ११ औं दक्षिण एशियाली खेलकुद सागमा नेपालले आज ५ स्वर्ण ४ रजत र ३ कास्य पदक जितेको छ । सागको ११ औं दिन नेपालले आज तेक्वान्दो र करातेमा २/२ तथा उसुमा १ स्वर्ण जितेको हो । त्यस्तै नेपालले आज महिला फुटबल, बक्सिङ्ग, तेक्वान्दो र करातेमा १/१ रजत पदक जितेको छ । यो संगै नेपालले अहिलेसम्म ७ स्वर्ण ९ रजत र १९ कास्य पदक जितेको छ । तेक्वान्दो खेलाडी दिपक बिष्टले सागमा लागतार चौथौं स्वर्ण जितेर किर्तिमान कायम गरेका छन् । ८७ केजी मुनिको तौल समुहको फाइनलमा भुटानका तासीलाई पराजित गर्दै बिष्टले लगातार चौथो पटक सागमा स्वर्ण जितेका हुन् । दशौं सागमा स्वर्ण जित्दै आफ्नै देशका धावक बैकुष्ठ मानन्धरको किर्तिमान बराबरी गरेका बिष्टले आठौ साग पछि लगातार स्वर्ण जितेर दक्षिण एसियाली किर्तिमान बनाएका हुन् । उनले रातदिन मेहनत गरी पदक जितेकाले जीवनकै सबैभन्दा बढी खुसी भएको प्रतिक्रिया दिए ।
तेक्वान्दोकै महिला तर्फ आयशा शाक्यले स्वर्ण जित्दा मनिता शाहीले भने रजत मै चित्त बुझाउनु परेको छ । ५३ केजी मुनि तौल समुहको फाइनलमा आयसाले भारतकी लतिका भण्डारीलाई पाखा लगाएकी हुन् । ५७ केजी मुनि तौल समहुको फायनलमा मनिता भने श्रीलंकन फातिमा केसाइसंग पराजित भइन् । त्यस्तै, उसुको थाउलोतर्फ थाइची छ्वानमा आङ्गबावु लामाले स्वर्ण जितेका हुन् । उनले विहान भएको फाइनलमा भारतीय खेलाडीलाई पछि पारेका थिए । करातेको कुमुते तर्फ६१ केजी मुनि तौल समहुमा गंगा अधिकारीले र ७५ केजी मुनि विनोद शाक्यले स्वर्ण जितेका छन् । अधिकारीले अफ्गानिस्तानका जैनबलाई र शाक्यले श्रीलंकन मोहम्मद् निफाजलाई पराजित गरेका थिए। करातेमै ६० केजी मुनि तौल समहुमा विनोद महर्जन भने फाइनलमा अफगानिस्तानका मोहम्मद तमिमसंग पराजित भएपछि रजतमै चित्त बुझाउन बाध्य भए । त्यस्तै पहिलो खेलमा पराजित भएपछि तेस्रो स्थानकालागि बंगलादेशी खेलाडीसंग प्रतिस्पर्धा गरेका कुसल श्रेष्ठले भने कास्य पदक हात पारेका छन् । यसैबिच, महिला फुटबलको फाइनलमा सोमबार भारतसंग १ का विरुद्ध ३ गोलले पराजित भएपछि नेपालले रजत पदकमै चित्त बुझाएको छ । पहिलो हाफमा जमुना गुरुङ्गको गोलबाट अग्रता लिएको नेपालले पहिलो गोल पेनाल्टी बाट भएको थियो । सोही विषयलाई लिएर खेल सकिएपछि नेपाली खेलाडी र रेप्रिmबिच भनाभन समेत भएको थियो । यसैबिच नेपालका अजित गुरुङ्ग ६० केजी मुनिको बक्सिङ्गको फाइनलमा घरेलु खेलाडीसंग पराजित भएपछि रजतमै चित्त बुझाउन बाध्य भएका छन् । यसैबिच, लक्ष्मण साउदले बक्सिङ्ग तर्फकाश्य पदक जितेका छन् । त्यस्तै आर्चरीको पुरुष टीम इभेन्टमा भुटानलाई पराजित गरेपछि नेपालले काश्य हात पारेको छ । टेबलटेनिस तर्फआज भारतीय खेलाडिसंग पराजित भएपछि मुना बासुकलाले कास्य पदकमा चित्त बुझाएकी छन् । एथलेटिक्समा भने नेपालले आज पदक जित्न सकेन । नेपालले आज सहभागिता जनाएका ६ मध्ये हाइजम्पमा मात्र बालकृष्ण चौधरीले सन्तोषजनक प्रदर्शन गरे उनले चौथो स्थान ओगटेका थिए । सागको अन्तिम दिन नेपालले मंगलाबार म्याराथनमा प्रतिस्पर्धा गर्नेछ । नेपालकातर्फाट राजेन्द्र भण्डारी र अर्जुन बस्नेतले सहभागिता जनाउंदैछन् ।

खेलकुद - थप सामग्री