रकम अभावमा सुरुङ कोठामा ताला

कपिलवस्तु, २८ फागुन (दैनिकी)

कपिलवस्तु कारगारबाट सुरुङ खनेर बन्दी फरार भएको दुई महिना बित्न लाग्दासमेत सुरुङ पुर्न कारागार प्रशासनले चासो देखाएको छैन। रकम अभावमा सुरुङ कोठामा ताला लगाएर राखिएको छ। एक्काइस फुट लामो र दुईदेखि अढाइ फुटसम्म चौडाइमा सीमित सुरुङ पुर्न र कारागार मर्मत गर्न गृह मन्त्रालयसँग करिब रु. ६ लाख बजेट माग गरे पनि रकम निकासा हुन नसकेपछि सुरुङ पुर्न नसकिएको बताइएको छ।
गत माघ १ गते राति सुरुङ खनेर बन्दी फरार भएको ७ नम्बरको कोठामा आरसिसी ढलान गर्न रु. १ लाख भन्दाबढी रकम आवश्यक पर्ने कारागारका जेलर ईन्द्रमणि भुसालले बताए। कारागारको कोठाका ढोका, पर्खाल मर्मत र चारैतिर सुरक्षात्मक काँडेतार राख्नका लागि माघ महिनामै जिल्ला प्रशासन कार्यालयमार्फत रकम माग गरे पनि अझैसम्म नआएको भुसालले बताए। प्रमुख जिल्ला अधिकारी शम्भुप्रसाद घिमिरेले रकम निकासाका लागि आफूले प्रयास गरे पनि अझै आउन नसकेको बताए। कारागारबाट बन्दी भागेको प्रकरणमा १४ सुरक्षाकर्मी, जेलर र पियन गरी १६ जना निलम्बनमा परेका र उनीहरूको मुद्दा जिल्ला अदालतमा चलिरहेको छ। उनीहरू सबैलाई अहिले धरौटी र साधारण तारेकमा छाडिएको छ। सुरुङ खनेर फरार भएका सात कैदीमध्ये प्रभुप्रसाद तेलीमात्र पक्राउ परेका छन्। रासस

अर्थ - थप सामग्री