बिराट क्याम्पसलाई महेन्द्र मोरङ क्याम्पसले पराजित

पुष्पराज थपलिया विराटनगर, २ चैत

नेपाल विद्यार्थी संघ इकाई समिति पुसेट क्याम्पसको आयोजनामा विराटनगरको शहिद मैदानमा सञ्चालित टि-२० अन्तरकलेज क्रिकेट रनिङ कप प्रतियोगिताको सोमवार सम्पन्न फाइनल खेलमा महेन्द्र मोरङ क्याम्पसले बिराट क्याम्पसलाई ७ विकेटले पराजित गरी उपाधी हात पारेको छ । टस जितेर व्याटिङ गरेको बिराट क्याम्पसले १९ दशमलब ५ वलमा सबै विकेट गुमाई ८८ रन बनाएको थियो । जसमा रवि पोद्दारले २५ रन र नन्दकिशोरले १५ रनको योगदान दिएका थिए । मोरङका आशिष लामाले ३ ओभरमा १३ रन दिएर ४ विकेट, अनुपमकुमारले २ विकेट तथा अमर सिंह र सुरेन्द्र साहले १-१ विकेट लिएका थिए ।
जवाफमा ८९ रनको विजयी लक्ष्य पछ्याएको महेन्द्र मोरङले १६ दशमलब ३ वलमा ३ विकेट गुमाई सो लक्ष्य पार गरेको थियो । जसमा जितेन्द्र यादवले नटआउट ४३ रन र आशिष लामाले २५ रनको योगदान दिएका थिए । बिराट क्याम्पसका सिद्धिचरण उप्रेतीले २ विकेट र सुमितकुमारले १ विकेट लिएका थिए । मोरङ क्याम्पसका अलराउण्डर खेलाडी आशिष लामा फाइनल खेलको म्यान अफ दी फाइनल घोषित भए ।
त्यसैगरी, आशिष लामा म्यान अफ द सिरिज, युनिभ कलेजका निरज यादव उत्कृष्ट वलर र महेन्द्र मोरङका जितेन्द्र यादव उत्कृष्ट ब्याट्समैन घोषित भए । फागुन २५ गतेदेखि सञ्चालन भएको सो प्रतियोगितामा विराटनगरभरीका नीजि तथा सरकारी गरी १२ कलेजको क्रिकेट टिमको सहभागिता रहेको थियो । विजयी तथा अन्य खेलाडीहरुलाई प्रमुख अतिथी पुर्वाञ्चल विश्वविद्यालयका उपकुलपति प्रा.डा.रामावतार यादव, विशिष्ट अतिथी पुर्वाञ्चल क्षेत्रीय क्रिकेट विकास समितिका सदस्य नन्दकिशोर राठी र नेपाली काँग्रेस मोरङका सदस्य रञ्जन थापा लगायतले पुरस्कार तथा ट्रफी वितरण गरेका थिए ।

खेलकुद - थप सामग्री