रक्सौल रेल दुर्घटनामा, ६ जनाको मृत्यु, सयभन्दा बढी घाइते

वीरगंज १० असार (दैनिकी)

वीरगंजको सीमावर्ती क्षेत्रमा पर्ने भारतको रक्सौलमा विहीबार भएको रेल दुर्घटना ६ जना यात्रीको मृत्यु भएको छ । अन्य एक सय भन्दाबढी घाइते भएका छन् । मृतकहरु मध्ये दुइ जनाको मात्र सनाखत भएको छ । सनाखत हुनेहरुमा भारतको भेलाही परसवाका महम्मद रसुल मियाँ र सहबजान मियाँ रहेका छन ।

नरकटियागंजबाट दरभंगाका लागि छुटेको २ सय १८ नम्बरको रेल रक्सौल स्टेशन नजिकै रहेको हवाई मैदानका अगाडि रेल लिक पार गर्दै गरेको बालुवा लोड गरेको जे एच १५ सी ३७६९ नम्बरको मालबाहक ट्रकसँग ठोक्किँदा दुर्घटना भएको हो । दुर्घटनामा परि मृत्यु हुनेहरुमा रेलको इन्जिनमा झुण्डिएर यात्रा गरिरहेकाहरु अधिकांश रहेको बताइएको छ । घाइतेहरुको उद्धार गरि उपचारका लागि विभिन्न अस्पतालमा पुर्‍याइएको छ ।

घाइतेहरु मध्ये केहीको अवस्था चिन्ताजनक रहेकाले मर्नेको संख्या अझ बढन सक्ने बताइएको छ । घटनाको विस्तृत विवरण आउन बाँकी रहेको छ ।

विदेश - थप सामग्री